Joris-Karl Huysmans

Joris-Karl Huysmans ( yoltackon Georges Charles Marie Huysmans ) ba 05/02/1848 koe Paris kobliyir.

Kobliyis koe Paris vox vey gadikyefa gama dem vlaanderaf yambik, dikis va rumeugal tuorikayan gan tolkurera ke gadikya. Tiyis spupiackaf oldik koe Saint-Louis olda, va rokopa vayar aze bak 1868 vanpir flibamik koe ristula. Komilkayan bak 1870 den ervolita ke Seine utca vox azon wagnuyun az gire koeldayan, kadimi geja koe Nederlanda koyar. Nope bata jonvielera, va Joris-Karl yoltega vanikatcur.

Bak 1874 va Le Drageoir aux épices dodeson sanegar, i va larma dem vedafa ezla, az va Marthe, histoire d'une fille taneaf berpot. Bata toza askir da in gan Émile Zola zo katcalar nume do Henry Céard is Guy de Maupassant is Paul Alexis is Léon Hennique, va Soirées de Médan dem intaf Sac au dos ( Eyelt keve ge ) berpotam dokobar, i va larma ke jotafa tuwavevafa serna.

Bak 1879 va Les Soeurs Vatard berpot pu to Zola tarizar. Wori mali bane sare, inafa tanuskuca raston gu rega ruyewer : taneon inaf martig tis wiaf is lingesikaf ton ewavamasa elimuca isu ukinda gu cug tuwavevik vaon soltrakur. Toleon tuwaveva pranton divdomar ise va riwe warlafa dirnura va raf wiceem ke bli exaksar solve Huysmans tir welakolaf is rotatrakurevaf glastedik divdaakes va boikera ke witafa tamava fotisa dem loote « todlik is eskodik ».

Koe En ménage berpot ( 1881 ) isu À vau-l'eau ( 1882 ) to va int wetce koredik tis kimtafe kaelikyeme konakilar, i wetce koredik ralentan gu ayikya ok burmotaksaj koe gradjokafe voltaxe. Bata forgafa rotakaca va lumiskafa is dustulesa zolonuca narid kire va solovuca ke spupiafa is megrupena is bexodiskafa blira lecad. Ton teca narara is durulafa trumara va pinta, berpotik va kaikanzasa piksa inker i va piksa divetisa vas vieleafa blira vols cugunaykaf goaspil. Edje va neva sanegar, pune Huysmans va flibafa klepa frendon wanur, kenofison va ristulaf fem is abicote koyason, anton ugalason va stuva ke intafi gestaroti.